സഹയാത്രികൻ

ഞാൻ ആദ്യമായി നടന്ന ദിവസം തന്നെയാണ് 
നീയെന്നെ ആദ്യമായി വീഴ്ത്തിയതും 
ജീവിതത്തിലെ കുഴികൾ ശ്രദ്ധിക്കാൻ വേണ്ടിയാകുമെന്ന് 
അന്നെന്നോട് അമ്മ പറഞ്ഞു 
ഞാൻ ഓടിത്തുടങ്ങിയ അന്ന് 
എന്റെ മുൻപിൽ നീയൊരു കായൽ ഒരുക്കി 
ജീവിതത്തിന്റെ ആഴങ്ങൾ അറിയാൻ വേണ്ടിയാകുമെന്ന് 
അമ്മ വീണ്ടും പറഞ്ഞു
ഞാൻ നീന്തിതുടങ്ങിയ അന്ന് 
ആ കായൽ നീയൊരു സമുദ്രമാക്കി 
തിരമാലകൾക്കെതിരെ ഞാനിന്നെന്റെ
കുഞ്ഞു തോണി തുഴയുമ്പോൾ
എന്തിനു നീ അതേ തോണിയേറി
എന്റെ എതിർ ദിശയിലേക്ക് തുഴയുന്നു?
വിശദീകരണങ്ങൾക്ക് പ്രസക്തിയില്ലാത്തതിനാൽ
ഞാനെന്റെ തുഴച്ചിൽ നിര്ത്തുന്നു
ഇനിയെന്റെ യാത്ര
നിന്റെ ദിശയിൽ ...